طمنى على مصر يا عم عبد العال (فلاح بلدنا الفصيح )

مصر بلدى
♦ سؤال موجه لعم الحاج عبد العال / فلاح بلدنا الفصيح
طمنى على مصر يا عم عبد العال
قالى مصر زي الفل وعال العال

♦ قلت له والناس.؟
قالى بيفطروا بيتزا وبيتعشوا حمام.
♦ قلت له والعيشه لساها مره.
قالى دي الناس من الفرحه مش عاوزة تنام
♦ قلت له يعني البلد حالها أتعدل.
قالى طبعآ دي مفيهاش كلام.

♦ قلت له أمال البلطجة والسرقة.
قالى ده إبراهيم الأبيض وده شغل أفلام.
♦ قلت له والضحايا والشهدا.؟
قالى يا عم دي تفاهات إعلام.

♦ قلت له أيه أخبار الخصخصة.؟
ضحك و قالى خلاص كلها قطاع عام.
♦ قلت له طب والدعم.
قالى مع التموين كل شهر ليك بلح الشام.
♦ قلت له وأطفال الشوارع.
قالى ملهمش غير الصنعة والعلام.

♦ قلت له والعشوائيات.
قالى كلها بقت سراميك ورخام.
♦ قلت له صحيح جرام الدهب عامل كام.
قال لى جرام أيه دة الدهب بيتباع خام.
♦ قلت له طب علي كدة بقى ماتشوف لى عروسة.
قالى خلاص مبقاش فى عنوسه كلها بقيت مدام.
♦ قلت له أيه أخبار ثورتنا.

قالى مطالبنا أتحققت وكله تمام التمام.
♦ قلت له مصر اللى بتكلمنى عليها دي مصر أم الدنيا
ولامصر أم الأحلام والأوهام.
ولا مصر كمان 100 سنة لقدام.
سكت عم عبد العال من غير حتى ما يقولى سلام.