♦♦♦ حوار مع حمار♦♦♦
◄نتعرف عليك لو سمحت.؟
• أنا حمار ولدت حمارا وأعيش حمارا وأموت حمارا.
◄جنسيتك لو سمحت.؟
• أنا من ...؟
◄حالتك الاجتماعية لو سمحت.؟
• أنا مش متجوز .
◄ليه .؟
• أتجوز ازاى وأنا معيش فلوس.
◄طب ليه متشتغلش .؟
• هو أنا لاقى شغل ومشتغلتش !!.
◄مش لازم تشتغل في الحكومة ، تقدر تعمل مشروع صغير تاكل منه عيش.؟
•مشروع صغير ؟؟ المشروع اللي بتقولي عليه حضرتك يكلفني كتير وكتير ويمكن أتحبس بسببه.
◄ازاى .؟
• المشروع دا عايز اكتر من 100 موافقة وموافقة ، ولازم استلف ولازم ياخدوا ضمانات ، وبعدين لو أراد الله وتم فتح المشروع هتيجى التأمينات الاجتماعية وتطالبني بفلوس ، وهتيجى الضرائب وتطالبني بفلوس ، وتيجى فواتير الكهرباء زي النار ، وتيجى وتيجى وتيجى ، وفى الأخر هلاقى نفسي مديون ومش قادر اسدد اللي عليا ويمكن ساعتها أتحبس.
◄طب استلف من أخواتك وقرايبك.؟
• أخواتي وقرايبى عاطلين ومبيشتغلوش.
◄ليه .؟
• في الحقيقة همة كانوا بيشتغلوا في شركات كبيرة جدا وبيكسبوا كتير جدا .
◄وبعدين إيه اللي حصل .؟
• اللي حصل إن الشركات دى اتخصخصت ، والمشترى قرر إنهاء خدمة اكثر من 80 % من العاملين وأخواتي وقرايبى كانوا من ضمن الناس اللي انتهت خدمتهم.
◄طب ليه متحاولش تشتغل في أي شركة أو مكان تانى .؟
• شوف 00 عشان اشتغل في أي مكان يبقى لازم يكون معايا واسطة ومعرفة أو ادفع فلوس كتير ، وأنا معنديش لا ده ولا ده.
◄ أنت عايش ازاى .؟
• عايش في الشارع.
◄ليه .. هو أنت معندكش شقة تسكن فيها .؟
• شقة .؟؟ هجيب منين فلوس الشقة .؟؟ عشان اشترى شقة غرفة من غير صالة في أسوأ منطقة هدفع ألفات مؤلفة ، ولو حبيت آخد شقة إيجار برضوا هدفع كل شهر مبلغ وقدره ، طب هعمل إيه يعنى وأنا معيش فلوس !!! .
◄ بس وجودك في الشارع كدة هيجيب لك أمراض كتيرة.؟
• دى حقيقة ، وأنا فعلا عندي اكتر من مرض .
◄ طب ليه متروحش المستشفى عشان تتعالج .؟
• المستشفيات مفيهاش رعاية ولا اهتمام ، مفيش دكتور بيجى في ميعاده ، والمستشفيات مفيهاش الأدوية اللازمة .
◄لو الموضوع بالشكل ده يبقى لازم ترفعوا قضية عشان تاخدوا حقوقكم
• القضاء حباله طويلة جدا ، يعنى عشان ارفع قضية دلوقتى ، يبقى الله اعلم مين من الورثة اللي هيستلم حقوقنا.
◄أنت ممكن تقابل حد من المسؤولين وان شاء الله كل مشاكلكم هتتحل.؟
• أولا .. مش ممكن لان الشوارع كلها مليانة مطبات.
ثانيا : مفيش علامات إرشادية كافية وعشان كدة الحوادث بتبقى كتير
ثالثا : الباشمهندس رادار شاطر جدا ع الغلابة ، لكن الناس اللي ليها ضهر بتلاقى الرادار يعمل له تعظيم سلام ويفتح الأبواب المقفولة.
◄عايز أسألك سؤال .. معاك بطاقة انتخابية .؟
•هعمل بيها إيه ؟؟ سواء روحت أدلى بصوتي أو مروحتش فنائب الدايرة بتاعتنا بيكسب من خمسة وتلاتين سنة وعمري مشوفت حد غيره كسب.
◄انت بتعرف كام لغة .؟
• أنا مبعرفش أقرا ولا اكتب.
◄ليه ؟ هو أنت مدخلتش مدرسة .؟
• دخلت .. بس المدرسين مكنوش بيشرحوا أي حاجة خالص عشان كل همهم الدروس الخصوصية.
◄أنا شايفاك نحيف جدا .. أنت عندك أنيميا .؟
• فعلا أنا عندي أنيميا.
لأن مصاصين دم الغلابة والفقراء اللي زى حلاتى كتار في البلد.
هم اللي مصوا دمنا وبقينا عندنا ( فقر دم ) وفقر في حاجات كتيره.
◄أنصحك تهتم بوجباتك الغذائية وتكتر من أكل اللحوم والفواكه.
• أنت باين عليك مش عارف المجازر اللي بتحصل في طوابير العيش ، ومش عارف المواد المسرطنة ، ومش عارفة جشع الجزارين اللي بيدبحوا الحمير اللي زيى ويبيعوها للناس على إنها لحم عجالى أو ضانى .
◄طب حاول تهتم بنفسك عن طريق ممارسة الرياضة.؟
• هي فين الرياضة ؟!!
◄بصراحة أنا شايفك تعبان جدا واعتقد انك محتاج تروح تغير جو في أي شاطئ من الشواطئ .؟
• الشواطئ حاليا....؟ يا حصرة عليها .؟
◄بس الحياة مش سوده بالصورة اللي أنت متخيلها ، أنت لازم تروح اقرب جامع وتصلى فيه ركعتين لله.؟
• أنت متعرفش أن الجوامع بتقفل بعد أداء الصلوات فيها .؟
ومتعرفش أن دخول الجوامع للاعتكاف فيها ممنوع .
◄بس البلد محتاجة للأقوياء عشان يحافظوا عليها من الاعتداءات الخارجية.؟
◄طب ازاى هتمتلك القوة .؟
• بالنووي .. اللي يمتلك السلاح النووي مفيش حد هيكلموا ولا هيقرب ناحيتوا.
• اللي يمتلك السلاح النووي مفيش حد هيكلمو ولا هيقرب ناحيتو
بهذه الكلمة سيداتي آنساتي سادتي نختتم حلقة اليوم.
ونشكر الحمار على هذا الحوار.